Անհանգստացնող հաճախակիություն են ստացել միջադեպերը իրանցիների ու հայերի միջև։ Արդեն մի քանի օր շարունակ լուրեր են հայտնվում հերթական բախման կամ սկանդալի մասին։ Այսօր էլ News.am-ն է աչքալուսանք արել.
«Երեւանի բժշկական համալսարանի հարեւանությամբ գտնվող «Այս» ակումբում մարտի 11-ի գիշերը դարձյալ ծեծկռտուք է տեղի ունեցել: Այս անգամ վիճել են հայ եւ իրանցի երիտասարդները: Նշենք, որ այս ակումբը աշխատեցնում են իրանցիները, եւ այստեղ հաճախ են տեղի ունենում սկանդալներ:
Վեճը նախ ծագել է հայ երիտասարդի ու իրանցի դիջեյի միջեւ: Վերջինս հարվածել է հային, նա էլ գրպանից հանել ատրճանակն ու կոթով խփել է իրանցուն, ապա վրա է հասել ակումբի մեկ այլ իրանցի աշխատակից, խլել ատրճանակն ու ծեծի ենթարկել երիտասարդին: Բարեբախտաբար, կրակոցներ չեն եղել: Դեպքի վայր են ժամանել ոստիկաններն ու բերման ենթարկել երիտասարդներին: Նշանակվել է դատաբժշկական փորձաքննություն, կատարվում է քննություն»:
Հասկանում եմ, որ Նովրուզին ընդառաջ նման բաները հաճախակիանալու են, բայց ակնհայտ է, որ խնդիրը կա, ու մեղավորությունը երկուստեք է, և պետք է պետական մասշտաբով խնդրի նկատմամբ մոտեցում մտածել, որպեսզի ավելորդ լարվածություն չառաջանա երկու դաշնակից երկրների միջև։
Երեկ բավականին էմոցիոնալ գրառում էի արել Իրանի քաղաքացի ոմն Աբոլֆազլ Ղոլամ Հասսան Դոլաթխահինի և հայ կին ազատամարտիկ Ժաննա Զաքարյանի միջև տեղի ունեցած միջադեպի մասին, որի արդյունքում դատական գործ է հարուցվել՝ իրանցու կողմից հայ կնոջը ծեծելու առնչությամբ։
Այսօր արդեն միանգամից մի քանի լրատվական ավելի մանրամասն են անդրադարձել թեմային, և պետք է խոստովանեմ, որ միանգամայն այլ պատկեր է ստեղծվում, որտեղ առնվազն կարելի է փաստել, որ իրանցին, մեղմ ասած, միակ մեղավորը չէ։ Մեջբերեմ «Առավոտ» թերթի նյութից կողմերի դատապաշտպանների պարզաբանումները, իսկ դատողությունները կթողնեմ ձեզ.
«Աբոլֆազլ Ղոլամ Հասսան Դոլաթխահին Հայաստանի դրոշի տակ հանդես եկող ըմբշամարտիկ է եւ միջազգային ասպարեզում ներկայացնում է մեր երկիրը:
Երկու երկրների քաղաքացիների միջեւ միջադեպը տեղի է ունեցել անցյալ տարի ամռանը` հուլիսի 31-ին, գիշերվա ժամը 1-ին: Ժաննա Զաքարյանը հրապարակում սպասելիս է եղել Իրանից ժամանող զբոսաշրջիկների ընտանիքին, իսկ Աբոլֆազլ Ղոլամ Հասսան Դոլաթխահին եղբոր հետ Հանրապետության հրապարակ է եկել Իրանից ժամանող սեփական հյուրերին դիմավորելու եւ իրենց բնակարան տանելու համար: Ժաննա Զաքարյանը, որը բնակարանները վարձով տվող միջնորդ է աշխատում եւ գործ է ունենում նաեւ Իրանի քաղաքացիների հետ, մեզ հետ զրույցում ասաց, որ Աբոլֆազլ Ղոլամն ու նրա եղբայրը վիճաբանություն են սկսել, հայհոյել եւ ագրեսիվ պահվածքով պահանջել Ժաննայից` «դավայ լինի հրապարակից»:
Մեզ հետ զրույցում Աբոլֆազլ Ղոլամ Հասսան Դոլաթխահինի պաշտպան Արթուր Ալիխանյանն ասաց, որ մինչ իր պաշտպանյալի ժամանումը Ժաննան մոտեցել է Աբոլֆազլ Ղոլամի հյուրերին եւ վարձով բնակարան առաջարկել, ինչից իրանցի հյուրերը հրաժարվել են: Ըստ Արթուր Ալիխանյանի՝ հետագայում այդ մարդիկ եւս գրավոր հայտնել են, որ Երեւան ժամանելուն պես մի տհաճ իրավիճակի մեջ են ընկել: Պատմել են, որ Ժաննայի ծառայություններից հրաժարվելուց հետո եկել են իրենց դիմավորող Աբոլֆազլ Ղոլամ Հասսան Դոլաթխահին եւ նրա եղբայրը, որ իրենց տուն ուղեկցեն եւ տեսնելով, որ Ժաննան է նրանց տուն առաջարկում, հենց այդ ժամանակ էլ սկսվել է վիճաբանությունը:
Մեզ հետ զրույցում Ժաննա Զաքարյանը պնդում է, որ ինքը միանգամայն այլ մարդկանց է սպասելիս եղել, մի իրանցի ընտանիքի, որը նախապես պայմանավորված է եղել Ժաննայի հետ, եւ Աբոլֆազլ Ղոլամին հարձակվել է իր վրա ու ծեծել: Երեկ դատական նիստում Ժ. Զաքարյանը միջնորդություն է ներկայացրել հեռախոսազանգերի վերծանումները հանելու, քանի որ կասկածներ կան, որ Աբոլֆազլ Ղոլամի հյուրերին բերող հայ վարորդն է զանգահարել Ժաննա Զաքարյանին` հայտնելով, որ իրանցի զբոսաշրջիկներ է բերում: Տիկին Զաքարյանը պնդել է, որ ինքն այդ տաքսու վարորդին երբեւէ չի զանգել, չի ճանաչում, ոչ էլ վարորդն է իրեն նման հարցով զանգել: Աբոլֆազլ Ղոլամիի հյուրերն իրենց գրած հայտարարության մեջ նաեւ հայտնել էին, որ վիճաբանության ժամանակ դանակ են տեսել, սակայն հստակ չէին կարողացել ասել, թե ում ձեռքին: Դատական նիստերից մեկում այս հարցը նույնպես քննարկվել էր: Պաշտպան Ալիխանյանի խոսքերով, ուշագրավ է, որ դանակի մասով ոստիկանության քննիչը քննություն չի արել. «Բայց բազմակողմանիության, օբյեկտիվության համար պետք է ճշտեր, չէ,՞ քննիչը»: Պաշտպանի խոսքերով, տուժող Ժ. Զաքարյանը «չափից ավելի ցուցմունքներ է տալիս, որը իրականությանը չի համապատասխանում»: Ըստ նրա. «Դատարանում ինքն ասում է, որ իմ պաշտպանյալը հարվածել է իր ոտքերին, ձեռքերին, գլխին, որովայնին, բայց դատաբժշկական եզրակացության մեջ հստակ երեւում է, որ նման վնասվածքներ չկան, ուղղակի մարմնական վնասվածքը մատը կծելու հետեւանքն է, որ ցանկացել է իմ պաշտպանյալը հեռանա դեպքի վայրից, բայց տուժողը թույլ չի տվել»:
Ըստ Արթուր Ալիխանյանի՝ Ժաննա Զաքարյանը տաքսու շարժը կանգնեցնելու համար մյուս ձեռքով կախվել է առջեւի աջ կողմի դիմապակուց եւ սկսել է ճանկռել Աբոլֆազլ Ղոլամին, որը ազատվելու համար տիկնոջից նրա մատը կծել է. «Ինչը որ ամրագրված է դատաբժշկական եզրակացության մեջ եւ եթե այլ վնասվածքներ լինեին, ապա դրանք էլ եզրակացության մեջ կլինեին»: Այս գործով արդեն 4-5 դատական նիստ եղել է` դատավոր Մխիթար Պապոյանի նախագահությամբ: Հարցաքննվել են մի քանի վկաները, ոստիկանները, ինչպես նաեւ մեղադրյալ Աբոլֆազլ Ղոլամին: Ժաննա Զաքարյանը մեզ հետ զրույցում նշել էր, որ ամենաշատը վիրավորվել է նրանից, որ Աբոլֆազլ Ղոլամին վիճաբանության ժամանակ ասել էր. «Լավ են արել թուրքերը, որ ձեզ մորթել են, պետք է ձեր քոքը լրիվ կտրվի»:
Պաշտպանի խոսքերով, Աբոլֆազլ Ղոլամին իր ներդրումն ունի մեր երկրի սպորտի ասպարեզում, ինչի վկայությունն են սպորտում ունեցած հաջողությունների համար նրան շնորհված դիպլոմներն ու պատվոգրերը: Աբոլֆազլ Ղոլամին Ըմբշամարտի ֆեդերացիայի կողմից պարգեւատրվել է 2-րդ հուշամրցաշարի ազատ ոճի ըմբշամարտի դիպլոմով: Ուստի պաշտպանը գտնում է, որ իրանցի երիտասարդը, որը մեր երկիրն է ներկայացնում դրսում, չէր կարող հայ ժողովրդի հասցեին հայհոյանքներ տալ ու անհարգալից արտահայտություններ անել»
:
